2016/09/16

الشاعر العربي مصطفى غنوم : حرايق بتولع حرايق

مش رايق انا مش رايق 

وﻻ هالعيشه ابدا طايق 
كل يوم بتزيد علينا هموم 
حرايق بتولع حرايق .

جدي قال العثمانين 
كانو عأرضو محتلين 
ظلموا الناس اجمعين 
علقوا بالمرجه والبرج المشانق 

بيي قال الفرنساوي 
حكم هالبلد بقساوه 
مع اﻷنكليزي بالتساوي 
أرض العروبه كان سارق 

بيي قال فلسطين 
لو كنا نحن متحدين 
ما تقاسموها الغربيين 
وحكمها الصهيوني النافق 

أنا عشت الحرب اﻷهليه 
يلي ورتتها من بيي 
فلسطين كانت القضيه 
السﻻح صار عكل المفارق 

نباع الوطن لمين ومين 
صرنا باﻷحياء مقسمين 
مش عارف انا مع مين 
بعرف اني هالوطن عاشق 

توحدنا بالطائف .. رجعنا تكبلنا 
ورجع ضاع منا أملنا 
بعد ما كانت القدس أملنا 
ما عاد القلب ألها خافق

حطوا قيود عالجهاد 
ما عاد شعار العرب اتحاد 
كل بلد صارت بﻻد 
منحتار مين نرافق 

صار في داعش والنصره 
الله اعلم مين بكرا 
بتقولوا العرب منتصرا 
وعاللجوء شعوب بتسابق 

صاروا العرب بحاره 
بدون ما يهتدوا بمناره
هاجر ابن الجار والجاره 
ما عاد عبابي جاري طارق 

عودوا يا مهاجرين توحدوا 
رجعوا عأرض العرب توالدوا 
القدس عمينادي يا عرب 
أﻷقصى نهد بأيد السارق 

بعد ما سرقو الوطن سرقو الهويه 
يا رايح عن وطنك تغير هويه 
رد بلاد العرب ردها قويه 
أمك أختك عمينادوك ويترجوك ترجع يا مفارق .

شاعر الميناء الشعبي مصطفى غنوم