2022/03/05

الشاعر سليمان الجوني : كمشةّ صدف عا كفوف بصارة عنجد يا هالشرق يا خسارة

 


يا ريتّ ثَوبْ الشعر والإلهام 

يزغَر على الأوهام والأحلام 

ويكّبر على الواقع وبالتحديد 

تلبُس حقيقة رَغبتو الأيام 

يا ريتّ ترجع ثورة التجديد 

تِسمع شو بدو الشعر بالأقلام

يا ريت نرجع يا عرب ونعيد

مجد الشعر من خزنة الأعوام


نحنا العرب كنا نقول البيت

متل الشرف عَشفافنا يُطلع 

واليوم صار الشعر عالسكيت

ما في حدا بيصَدق المطلع 

نسيتو بإنو بّكِل دار وبيت 

للكون نحنا الحرف والمقلع

واليوم صرنا عا لهيب الزيت 

لو صنفونا ..قنبلة منُطّلَع 


وين سيف الشرق يا إخوان ؟

وشعب النبي والحرف والقرآن؟

وين القبايل والهمم والسيف

وين المراعي والإبل والضيف

وين الرمح والخيل والفرسان؟


وين القصيدة من إرث شعبي ؟

كانت كإنها تياب للكعبة 

واليوم صارت هرطقة ولعبه

يا غبن خنسا وثابت وحسان


ليش فرقنا الوقت والقهر

ليش ما منجمع سلال الزهر؟

شوقي سلامو من الصبا للنهر

وبعدو بيَّان النُطق ذاتّ لْسان


حلمي خَلَصّ يرّجَع الشرق يفوت

بدال القنابل يفّجُر المَكبوت 

ويرجع قْطار يوَصِلّ البلدان 

ولا في حدود ولا حَرسّ أو خوت

حلمي اذا بيوقف أبو عدنان 

يصَرخ على الموقف كَفانا سكوت

تاكسي تاكسي مين؟  عا لبنان

من القاهرة نازل على بيروت


حلمي تعود الإم بالزفة

لما تجوز بنت بالعفة

تنزل من الاردن عا سوق الشام

تطرز فساتين وفرش.. وحرام

صوف العروبي يرجع يدفي


حلمي بَطل من تونس الخضراء

لو طلّ عهد الإنتدَاب وجاء

ينزل بِثورة لونها أحمر

وتكون يّدو لونها حمراء 

قرفنا يكون المعبَر مسكر 

قرفنا نزاع على الارض والماء

قرفنا حروب مّجالها أكبر 

من ثأر بكر وداحس وغبراء


عا كل حال الشرق شو بدو 

والأنبيا كِلُن إجو حدو 

عُطيوه قيمة وتجربة ووقفات

لو طل نيزك قادر يصدو 

ليش مختلفين ؟ عالصفحات 

وكلو بِشوف الدين عا قدو 

ورب الدني عا جنتو بالذات 

هوي بِسامح متل ما بدو 

بيكّفي على الخناس ما تردو 

بيكفي بحبل التفرقة تشدو 

الله عطاكن حبل في هالشرق

إعتصمو وبحبل من السما تهدو


ليش بدنا نخاف طيارة 

تَعمُل علينا من السما غارة

ونحنا أبابيل السما من الجو 

وعالارض كنا نلاشق حجارة

عَنجدّ يا هالشرق يا خسارة 

نسينا إبن سينا وعُلوم الضو 

وشفنا أبو النواس فُخارة

وعشنا مع الماضي يا ريتّ ولو 

وشفنا المُستقبل رواية أو 

كمشةّ صدف عا كفوف بصارة 

عنجد يا هالشرق يا خسارة


منرجع بإذن الله والتوكيل 

شعب واحد خارج التضليل

وكَف دجلة نمِد من بغداد 

يسلم بإيدو عا كفوف النيل 

وعتَاب هاك الشمس لولا بعاد

بتِبعُد عن الأهرام أنجق ميل 

والريح لو وَدِتّ رِياحّ شّدَاد 

قبالو أرز لبنان ما بيميل 

ولولا القمر سكَر بوابو وعاد 

من نَجِد منولع رُبع قنديل 

والغيم تا يلبس تياب جداد 

نازل الخيمة من الكويت يشيل 

يا شرق طَيرّنا بسَماك ولاد 

نحنا عرب نحنا ولاد الجيل 

نحنا ولاد النصر والإكليل 

منحِب نلعب في تراب الأرض

ما عاد بدنا لعبة التدويل